[電影]英皇電影寰亞聯手打造《盲探》 Sammi華仔激出火花

英皇集團主席楊受成博士、林建岳、導演杜琪峯、監製韋家輝、劉德華（華仔）及鄭秀文（Sammi）等，昨日於會展為英皇電影及寰亞聯手製作的電影《盲探》進行宣傳。華仔及Sammi同時現身，Sammi以一身綠色打扮盡顯清新，凸顯其纖腰。這對最佳拍檔於台上表現合拍，不時搭膊頭又拖手拍照，表現得相當老友。

兩人再次與杜琪峯組成「鐵三角」組合，提到會否擦出火花時，Sammi即大呼：「好大火花啊！見到佢（華仔）好火！」她補充指與華仔的信任和了解，令演戲過程中可表現得更放，亦能大膽和誠實地演出及發揮。
 

透露電影解決戾氣
提到大會播出電影預告片時，發現有血腥場面及Sammi斬人的鏡頭，華仔一臉感慨地提到近日的倫常慘案：「今日睇到預告片唔知係咪天意，心盲無名（劇中對白）係會殺人，呢段時間覺得香港變咗，都係嗰啲（倫常慘案）畫面。家香港人有好多戾氣，希望《盲探》可以話畀大家聽點解決，不過呢套戲好輕鬆同埋有黑色幽默。」問作為父親是否特別心噏，華仔直言：「作為任何人都會覺得有問題啦！但正正因為有呢啲事發生，等大家開始花時間了解身邊人嘅睇法，家都有親子機構提供方法畀家長同仔女溝通！（會唔會驚第時囡囡大個會咁？）個個人都有問題，我都未有咁快啦，最緊要係花多啲時間了解身邊人。（會唔會諗定第時點同囡囡溝通？）有排啦！」
 

近日新聞嚇怕生BB
談及早前把嬰兒衫送予錢嘉樂，華仔表示：「拍戲時已經送咗，好多都用唔晒！」而Sammi亦表示自己都有送贈華仔嬰兒用品。記者打趣叫華仔回禮，他笑言：「睇吓佢生唔生啦！」一旁的Sammi就指近日的新聞都令她不敢生仔，又指自己未有想過要生育，她又言：「其實一切都有主宰，有時乜嘢都要接受！（係咪同許志安有共識？）今日唔講呢啲啦﹗（咁華仔會唔會生多個？）更加唔敢答！」

來源: http://www.hkdailynews.com.hk/enews.php?id=275807