[音樂]【Sammi尾場】「民間特首」任嘉賓 Sammi叫開騷 劉華：等我生多個先

Sammi話好開心：「唔好意思，每次演唱會都要勞煩你。」劉華話：「點解你講呢啲說話呀？每次我嘅演唱會都煩到你。」

Sammi問對方幾時再開？劉華竟說：「等我生多個先啦﹗」全場嘩然，就連Sammi都話：「真定假呀？咁你努力努力。」劉華笑指：「晚晚都有﹗」Sammi即笑指華仔愈嚟愈OPEN：「真係估你唔到。」

Sammi大讚華仔係佢電影世界內嘅好好拍檔：「我真係好好彩可以遇到你，同你合作有份好大信任及安全感，我記得拍《盲探》，喺油尖旺拍外景，你知啦華仔喎，出現油尖旺喎，直頭成個油尖旺地下都冧咗啦﹗佢一出現，半個油尖旺嘅人都湧住去，但當時…我仲記得佢要保護我，我真係覺得去邊到搵呀？又靚仔，唔好生住先啦，拍多部戲先。」

劉華聞言便說：「你都搵到啦，搵到啦總之。」Sammi就話：「搵到兩餐呀？」劉華再說：「你使乜搵兩餐啫？你唔食嘢呀﹗」Sammi嚷着：「我食呀﹗」劉華續說：「拍《盲探》，佢嗌咗兩個生炒牛肉飯，我見到佢，咦﹗有冇搞錯，會食兩盒飯，但啲牛肉咁細粒，坐喺旁邊係咁撥開啲飯。」Sammi即說：「好似食雀栗，同埋食咗好耐，又唔飽，又食得少。但食唔晒啲飯會攞返屋企，啲飯唔會掉。」

Sammi感謝華仔幫忙：「你唔好走住，現場觀眾唔會放過你，你就咁走咗，呢度冧場都似。」劉華話：「我今晚唔會走。（咁你唔好咁耐，一首歌時間，我要勁歌熱舞。）就算一首歌我就睇埋先走。」

當Sammi返後台換衫後，劉華喺台上表示：「最後一場呀﹗我哋要令到Sammi開開心心好冇？喺度見到12000人，我諗你哋當Sammi係好朋友，你哋對朋友定義係點？

如果有啲人佢因為你難過，而佢哋快樂，嗰啲係敵人；有啲人因為你快樂，所以佢哋快樂，呢啲係朋友，有啲人因為你難過而難過，真係要擺佢喺心入面，我亦希望你哋明白到Sammi面對你哋時候，你哋快樂佢會快樂，你哋難過佢會難過，希望未來日子，好好將佢擺喺心入面好冇？我想講，如果有一日，我同Sammi都老咗，喺街度撞倒你哋時，如果你哋仲認得，唔該你哋埋嚟畀我擁抱我，然後畀我一個微笑，話畀Sammi知，你哋心裡仲有佢。」
之後劉華獻唱《如果有一天》，並與觀眾握手，非常親民，唱完後劉華返回VIP同鍾楚紅﹑許志安及Sammi媽媽睇騷，非常投入。