(蘋果日報即時新聞)
添叔李添勝入48年，打過無數大大小小嘅仗，精采之作無數，由《網中人》、《親情》、《鹿鼎記》、《笑傲江湖》、《楊家將》、《大頭綠衣鬥殭屍》、《鐵馬尋橋》、《鐵血保鏢》、《巾幗梟雄》，以至cult劇《神探高倫布》等等，皆出自其手筆。如今，添叔終於退下火線了，榮休！
添叔嘅榮休晚宴噚晚喺尖嘴北京道一號一家酒樓舉行，筵開22圍，出席者包括曾勵珍、羅蘭姐、劉丹、鄧萃雯、陳山聰、陳展鵬、江美儀、胡定欣、馬賽、許秋怡王書麒等等等等，場面好熱鬧。
滿場飛嘅添叔非常開心，又同添嫂合照晒恩愛。添叔話:「好多謝大家，其實我都到咗退休年齡喇。我60歲嗰陣，陳志雲同我講，話我仲棕紮紮跳，可以再做下，做多兩年。做多兩年之後呢，梁博士梁乃鵬又同我傾喎，叫我唔好逐年續約喇，一續續兩年啦，做到依家，我做多咗7年喇，今年我都68歲喇，喺TVB都做48年。我係69年5月1號加入TVB嘅。」
為無綫效力多年，添叔自言一定唔捨得，「點樣唔捨得都好，人始終有退落嚟嘅一日，同埋自己體能都有啲問題，膝頭哥開始退化，同埋尾龍骨嘅問題都令我好困擾，因為有一節歪咗，企得耐會腳痺，同埋有時開工要探班，要落廠走幾轉，真係幾辛苦。呢啲都算應付得嚟，但有啲大型古裝劇，要返大陸拍，就會好危險。」
「我今個月底同無綫所有嘢都會完晒0架喇，我係住家男，平時都會做家務。因為我依家住村屋，屋前有塊地，我諗住退休之後拎幾個發泡膠箱種下嘢，同埋我有兩粒孫，得閒湊下孫，陪下太太，做下運動，不過太劇烈嘅運動我就唔得0架喇，我最鍾意游水，之前一個禮拜都游四日水0架。」
Amy Lam