(蘋果日報即時新聞)
劉德華早年開始熱愛打保齡球，不時相約圈中好友練習，曾經生日也在保齡球場上同三五知己良朋歡度，其中南華會就是華仔最熟識的地方，不過現年五十四歲華仔自從迎聚朱麗倩，在2012年誕下愛女劉向蕙之後，全心投放在家庭上，同保齡球賽道成為陌生之友，好少再見到華仔打保齡英姿。
噚晚九點二十分左右，竟然喺南華會保齡球場上發現華仔同鄭則仕蹤影，同行幾位友人屬全男班。天王駕到，認真大陣仗，現場有三位保鑣不斷巡視，以防華仔受到騷擾；打波期間華仔同鄭則仕十分投契，不時咬耳仔密密傾。鄭則仕同是保齡球高手之一，全中無難度，二人似是研究打波手勢同技巧。
有一名女粉絲衝破防線上前想影合照，有民間特首之稱華仔禮貌地同呢位女粉絲講：「唔好意思，呢度唔影得相。」奈何華仔打波放閃太耀眼，更打出全中分數，吸引途人同粉絲注視。打波接近一小時內，不斷有粉絲欲上前向華仔集郵，華仔見到呢個情況於心不忍，接近十一點左右，華仔親民地走向粉絲人堆中，高峰期有約五十人擠迫在小小電梯大堂位置，大家爭相同偶像合照。
華仔為解混亂場面，即刻話：「慢慢嚟，女士先好唔好？」一群粉絲突然好識做回應話：「我哋唔阻你打波，一班人一次過影啦!」亦個別有粉絲想單獨同華仔合照，華仔就立即學足周潤發，反過來手持粉絲手機玩selfie，令到一眾粉絲興奮不已，其中一名粉絲仲拎咗個特大保齡球樽俾華仔簽名，華仔都一一答應冇拒絕。
華仔打波放閃太耀眼，更打出全中分數，吸引途人同粉絲注視。
華仔見咁多fans影相，為免影響其他市民，即主動「呼召」歌迷到出面逐一集郵。
Amy Lam
贝偌依紫