【一講嘢就痛】華仔情況好轉 可以短暫坐起身 

(蘋果日報即時新聞)

劉德華(華仔)早前在泰國拍攝廣告發生意外，導致盆骨骨折，需要在養和醫院休養。日前譚詠麟曾「硬闖」探望華仔，並指華仔講嘢同笑都會覺得好痛。(相關新聞： http://bit.ly/2jeX4Ak )

今日下午1點半左右，向華強與太大陳嵐現身養和醫院，問到佢哋係咪探望華仔？向太話：「係呀係呀。」仲話會幫記者問候華仔。

向生向太逗留約半小時後，於下午2點左右離開養和醫院，向太表示華仔精神好好。問到華仔講嘢仲有冇痛？向太話：「梗係有。」身旁嘅向生亦表示華仔精神好好。至於華仔方面發聲明稱會留院六至八周，會唔會比預期早出院？向太話都要睇個傷勢嘅恢復程度。

咁向生向太有冇帶啲咩畀華仔食？向太笑謂：「我都唔知佢食得乜，下次嚟先。」佢又話好多朋友託佢問候華仔，又送藥方又有神醫都等緊華仔：「好多鍾意佢嘅人都好關心華仔，我覺得華仔做得好事多，菩薩都保佑佢，今次係不幸中嘅萬幸，係一個小劫。」向生又同大家講華仔一定好得番，叫大家放心。

向太透露華仔農曆新年應該冇得返屋企，因為佢唔可以打石膏，要畀時間啲骨癒合：「佢都可以少少、短時間咁坐下。」咁華仔太太朱麗倩係咪都留喺醫院陪華仔？ 向太則表示朱麗倩屋企醫院兩邊走。最後，向生拍拍心口再一次叫大家放心：「好得返、好得返，我哋睇完都放心，我都放心。」之後兩人乘坐紫色房車離開。

另外，有指華仔連最錫嘅囡囡向蕙都唔畀到醫院探病，因為華仔覺得醫院多病菌；而且怕囡囡見到自己傷咗唔郁得會喊，所以只能夠日日用FaceTime見面。

來源: http://hk.apple.nextmedia.com/enews/realtime/20170126/56226096