[音楽]【開騷險爆粗】被劉華指下半身減得瘦 阿倫：因為冇乜點用！

 

劉華擔任阿倫第三場紅館個唱嘉賓，兩人喺台上玩到癲。

 

譚詠麟（阿倫）嘅紅館演唱會，噚晚舉行第三場，嘉賓係劉..德..華…，哇哇哇！阿倫同華仔係相識幾十年老朋友，阿倫介紹佢出場時，亦提到陳年往事。
話說當時兩人同屬藝能公司旗下藝人，華仔當年拍戲成績好好，片約不斷卻想要發展歌唱事業，兩位老闆就派阿倫做說客去勸他，點知反過來被勸，最後因華仔真係好努力，變成好支持佢。
華仔笑言演唱會檔期，全部畀阿倫搶咗，自己冇機會開，因為阿倫除咗自己開騷外，又要同溫拿、杜麗莎及左麟右李開，就連去馬來西亞、新加坡做嘢，都見到阿倫開騷，阿倫則笑謂，因為開騷好玩，同埋如果自己唔唱歌，只會變成三百磅大肥佬！
其間華仔問阿倫：「你下半身減得好瘦喎！」阿倫答：「因為冇乜點用！」兩人即大笑，華仔再笑答：「你睇我都keep得好瘦，所以到今時今日至做老竇！」
由於兩人感情太好，喺台上玩得好開心，差啲爆埋粗，擾攘一輪後，兩人先合唱《愛在深秋》；二人依然玩個不停，由台上玩到台下，因三哥苗僑偉夫婦都嚟睇騷，兩人竟叫三哥三嫂（戚美珍）伴舞，而華仔之後再唱咗首《誰可改變》。

 

來源: http://hk.apple.nextmedia.com/enews/realtime/20150216/53444839