(明報即時新聞)

【今晚直擊】吳君如﹑吳鎮宇﹑方中信等，今晚出席電影《妖鈴鈴》香港首映禮，君如父母夏春秋與老婆﹑君如弟弟吳君祥﹑君祥女友江美儀﹑農夫﹑曾華倩﹑周家怡和王菀之等出席，而最驚喜的莫過於君如好友「劉博士」劉德華和鄭秀文（Sammi）驚喜現身，君如可謂碌爆人情卡。

華仔替君如戴上四方帽，並頒贈香港導演畢業證書給她，令君如相當感動，君如說：「劉博士（劉德華）前幾天WhatsApp我，話會出席首映，會來撐我，我知道後好開心，感動到喊出來，他這個WhatsApp真是救命Call，多謝他一直支持。」

華仔亦鼓勵君如：「見妳條路跟我差不多，大家由演員做到監製，妳搶先我一步做了導演，我仍有這個夢。」君如說：「我不是想攞苦嚟辛，純粹因為好少人會找我這個年紀的人拍戲，不同男士拍拆彈或動作戲，所以要轉做導演。」

華仔再安慰君如：「好開心見證到妳行這條路，雖然會遇到挫折，但妳不會一個人面對，還有陳生（陳可辛）喺度。」君如此時更激動：「我好明。」

之後君如又笑問華仔：「條腰好番未？現在晚晚好掂？」華仔笑答：「我未試過，試了再告訴妳﹗」

華仔現身撐場，兼向君如戴四方帽和頒贈證書，令君如感動不已。

華仔幫君如戴四方帽。

來源: https://ol.mingpao.com/php/showbiz3.php?nodeid=1514385887803&subcate=latest&issue=20171227

********************************************************************************************************

【劉博士神秘現身】吳君如慰問華仔腰傷：係咪晚晚都好掂？

(蘋果日報即時新聞)

吳君如首次執導嘅電影《妖鈴鈴》，噚晚喺金鐘舉行首映，劉德華突然現身支持君如，君如好激動眼濕濕多謝華仔。

華仔現身戲院即直呼君如導演，君如話：「前幾日劉德華12點40分whatsapp我，話嚟睇我首影，我撐你，我滴咗兩滴眼淚，跑緊十幾個城市都唔知自己喺邊，呢個電話係救命call。劉德華做咗我表哥好多年，今時今日成為咗博士，仲嚟support我呢個小學雞導演，我好需要人話畀我知我ok 。」華仔話：「你條路好似我，做演員到監製，不過搶先咗我做導演，我都有呢一個夢，你要有信心繼續落去。」

君如就笑稱：「你估我想攞苦嚟辛咩，女人老咗邊有咁多戲演，你哋仲可以去下紅隧拆彈。記得《捉妖記》老闆叫我做隻肥怪獸，仲話《寒戰》會搵我做女主角，搵我笨咩，都冇女主角，收到華仔電話，我真係喊咗，佢一直都好支持我。」華仔予以安慰話：「見你由演員、監製、做導演，踏上巔峰崎嶇路有挫折係應該，有啲嘢仲係一個人，你條路幾好，有啲傻佬走埋嚟。」君如聽完即哽咽話我好明白，兩人希望再合作。

感性說話講完，君如問候華仔腰傷，華仔話：「好返哂。」君如就笑佢係咪晚晚都好掂？華仔笑住話：「未試喎，試過話你知。」最後華仔為君如帶上四方帽，並頒贈証書給君如，以示成功當上導演，華仔話：「在心中，除咗有老公，仲有我呢個表哥親戚一路陪伴。」

華仔為君如帶上四方帽，並頒贈証書

來源: https://hk.entertainment.appledaily.com/enews/realtime/article/20171228/57635259