[電影]劉德華兩片橫跨兩個月上 同青雲合作難忘被吊8層樓

(蘋果日報即時新聞)

武漢肺炎影響下，不少電影都要延期出街，現時疫情有緩和迹象，之前拍好的電影亦陸續安排上映，好像劉德華主演的電影《熱血合唱團》和《拆彈專家2》排住隊分別於11月和12月上映。其中劉德華、劉青雲及大陸女星倪妮主演的《拆彈專家2》，將於2020年底上映，今次亦是華仔、青雲繼《嚦咕嚦咕新年財》後，相隔18年再度合作，二人在鏡頭前正面交鋒，戲外則無所不談，十足「老朋友」一樣。至於已拍竣3年，一直未有映期的《熱血合唱團》，終於定了11月底在港上映，而大陸於11月13日率先上映，而電影官方網站近日發佈最新預告片。

問到兩位影帝最難忘的拍攝場面，青雲坦言是當中一場「拯救」戲，二人登上一輛貨van，然後由吊臂將貨van吊上8層樓高，青雲說：「雖然導演有話吊高，但冇講話吊幾高，拍攝時候1、2、3就吊咗上去，我仲諗住會慢慢試，點知一take搞掂。」身旁華仔聞言即指：「雖然係好快，但見武指佢哋好認真，每次吊之前都會檢查條威吔有冇破損，以前拍戲就搵命博，而家會覺得被照顧，安全感好大。」除了吊威吔戲，對華仔來說，最有印象的是可以再次和青雲合作：「我最深刻係同青雲開工，感覺好新鮮，好似見返個舊朋友咁，十幾年前合作嘅感覺返晒嚟！」

提到今次角色，青雲表示演繹和第一集有點不同，他說：「之前我演嘅拆彈專家，係帶有喜劇感，今次就係實牙實齒嘅拆彈專家，有好複雜嘅行動同大型嘅爆炸，而且今次帶出一個訊息，有啲嘢失去咗係搵唔番。」華仔亦表示今次電影充滿令人反思的訊息，就連他亦有所覺悟：「意外同明天，大家唔會知道邊樣出現先，戲中嘅我，成日緬懷過去，然後又會話將來要點點點，但其實最重要嘅唔係過去、唔係將來，係現在。」他亦指戲中帶出世界上最危險的炸彈，其實是人性。

繼《嚦咕嚦咕新年財》後，青雲和華仔相隔18年再度合作，新戲在年底上映。

青雲和華仔異口同聲最難忘在戲中被人吊8層樓高。

二人再次合作，大家都甚有默契。

青雲表示今次在戲中他是實牙實齒的拆彈專家。

劉德華有份投資的電影《熱血合唱團》，3年前已完成拍攝，但拖到今年才有映期。（影片截圖）