(蘋果日報)
【西貢】
劉德華同鄭秀文（Sammi）噚日喺西貢大街幫杜琪峯導演嘅電影《盲探》開工。晨早10點左右就見到班工作人員喺度擺機器，仲開咗個帳篷畀導演喺入面休息。大概11點左右兩位主角就開始埋位開工，一身西裝扮盲嘅華仔，同着住外套、low cut嘅Sammi喺間露天茶座度傾偈。話晒有兩位大明星喺度，當然吸引咗唔少街坊圍觀，最多有成20幾人，華仔同Sammi仲會同班街坊打下牙骹，可能佢哋已經喺度拍咗幾日戲，來來去去都係見嗰班街坊啦。
亂耍盲公竹
雖然已經入秋，不過噚日天氣仲係好熱，未正式拍攝時華仔都會除咗件外套唞氣，到要長時間等埋位嗰陣，Sammi同華仔都會跳上自己架七人車歎冷氣，都唔肯走入導演嘅帳篷度焗。
戲裏面做盲眼偵探嘅華仔有枝盲公竹跟身，當唔使埋位嗰陣，佢就會馬戲班藝人上身，將枝竹好似表演雜技咁當棍舞，睇嚟51歲嘅華仔身手仲有番咁上下。
http://hk.apple.nextmedia.com/entertainment/art/20121025/18047935
