[その他]下月殺入香港 崔振赫想睇尖嘴煙花匯演 ~ 印象深刻藝人是劉德華

《蘋果》獨家專訪 -

憑《繼承者們》、《急診男女》等韓劇而為人認識嘅男星崔振赫，將於下月14日首度來港舉行粉絲見面會，因為劇集帶挈令到佢係本港吸納咗唔少粉絲，日前佢接受訪問時，坦言對今次嘅香港之行好期待，特別想親自到尖沙嘴海傍欣賞煙花匯演同大擦點心，又希望同劉德華、郭富城和梁朝偉等靚仔巨星合作。

現年28歲嘅崔振赫今年可以話係豐收嘅一年，先後拍咗《急診男女》、韓版《命中注定我愛你》同《傲慢與偏見》等韓劇，當中佢同宋智孝主演嘅《急診》仲成為Google 2014年度香港熱門搜尋排行榜十大電視節目嘅第五名，而佢首部孭飛嘅免費電視台劇集《傲慢與偏見》，開播至今到前晚播出嘅第17集都一直保持冠軍位置，可見崔振赫係韓國已穩佔一席位。不過有傳佢明年入伍，今次有機會就成為佢入伍前最後一次嚟見香港粉絲。

繼早前佢係首爾舉行見面會後，下月14號崔振赫將會喺九展舉行「Choi Jin Hyuk fan meeting in Hong Kong : the First Date」粉絲見面會，今次將會係崔振赫首次來港見粉絲，日前佢接受本報訪問時就透露首度訪港心情十分興奮，仲希望係粉絲見面會上同粉絲可以近距離接觸，佢賣口乖話：「好想同無時無刻都支持我嘅粉絲見面，自己十分期待一月嘅來臨，到時就可以同粉絲一起度過美好嘅時光，大家記得等我啊！」

雖然佢係首度嚟港，但佢對香港就絕對唔陌生，佢話：「我記得以前睇過一啲電視劇同電影嘅時候，令我最深印象喺新年除夕嘅時候，喺尖沙嘴海傍可以欣賞煙花匯演，自己都好希望可以喺尖沙嘴現場親眼目睹。」除咗煙花匯演外，崔振赫最想嚟香港大擦一頓，雖然本身佢就唔偏食，但本身都係名副其實嘅食肉獸，所以此行雖然行程匆匆，但佢都好想品嚐以肉類為主嘅美食，當然旅客最鍾意嘅地道點心亦都係佢嘅目標。

至於香港嘅藝人同電影，崔振赫本身都有留意，電影方面佢就最鍾意經典作品《英雄本色》同《無間道》，佢自爆電影中每個場景都令佢印象深刻。而藝人方面佢就話劉德華、郭富城同梁朝偉係韓國好出名，所以基本上佢哋嘅電影佢都會欣賞。

來源 : http://hk.apple.nextmedia.com/enews/realtime/20141225/53265070