[その他] 歎不及劉德華好命遇到好角色 黃秋生演葉問：終於執到上上籤！

黃秋生83年亞視訓練班入行，參演過超過200部電影，曾經兩奪香港電影金像獎影帝，外界對秋生的演技無庸置疑。不過，秋生卻認為從影30年以來，始終不及劉德華好命，好機會不多，經常執到的只是「下下籤」。直到最近接拍電影《葉問──終極一戰》，演繹一代宗師葉問晚年生活，認為是難得執到的「上上籤」，更形容該片是至今至愛作品。從來天不怕地不怕的秋生，接拍該片前竟然有顧慮，完成後更感到唏噓，從秋生的投入程度，看來導演邱禮濤真的沒選錯人。

　　撰文：杜淑霞　攝影：李權威

　　秋生跟導演邱禮濤早於亞視工作時已認識，其後兩人合作無間，邱禮濤93年執導的《八仙飯店之人肉燒包》，更令秋生首度登上影帝寶座。今次籌拍《葉問──終極一戰》，邱導坦言男主角葉問由秋生來演肯定有新鮮感，反而秋生被委以重任，起初大表詫異，接拍後更感到後悔。

　　怕被網民質疑

　　秋生解釋為何接演這角色心情反覆，「佢（邱禮濤）問我時，我以為佢飲醉講笑，仲問佢『唔係嘛？你講笑呀！』我又醉醉地，諗半秒就應承！點知後尾諗諗下真係唔對辦，真係驚做唔到打爛齋破埋招牌當柴燒，如果自己無信心求其做，點對得佢住，點對得住冼老闆（冼國林）咁睇得起，對唔住自己，更加對唔住列祖列宗（邱：亦都對唔住廣大觀眾！）係啦！因為外形上差太遠，詠春又從來未掂過，唔知係乜，?晒頭！依家仲要有葉問宗師片睇到，初頭係覺得有挑戰，後尾發覺唔對辦。唯有帶住個樁成年，大陸拍戲去到邊練到邊。外形方面，如果要瘦到葉問宗師當年咁，我就要減到拍《頭文字D》時140幾磅先得，但係時減到內臟都傷晒仲點打，好在後尾畀我發現葉問宗師有個肚腩相，我就放心晒！（邱：佢住！）係！帶住張相身，費事內地網友好牙擦挑戰你時，都可以出做證。」

 
　　好多板斧未出

　　秋生坦言接受挑戰是因「我仲有好多板斧未出」，但秋生慨歎多年來好機會難遇，直到今次能夠做葉問，「你唔覺得我咁多年，雖然拍好多戲，但你歸納其實種類唔多，總之劉德華做過，我全部未做過，佢執親幾好籌，全部上上籤，我全部下下籤，呢次終於係上上籤啦！成日做訪問，人會問最鍾意邊部戲，有係幾好，但係都係咁上下，但呢部真係最鍾意，導演又好，劇組對手又好，個景又靚。拍咁耐真係好少遇到，多就變劉德嘩嘩！嘩！嘩！啦！佢條命生得好！」秋生拍罷時更一度感到唏噓，「就好似人生咁，如果你成日做好狗，又吸毒又出賣朋友又樣衰，你都想快死啦！但如果你人生好精采好豐富，家庭又好，父母又好，又搵到份好工，子女又好，呢個人生完先至會唏噓。當我佛山拍完套戲，收拾行李返香港時，就有咁感覺！」