[电影]【聽日56歲牛一】囡囡抹腳片流出 華仔冧爆：大家都睇到啦

劉德華同甄子丹主演嘅電影《追龍》，噚晚喺又一城舉行首映禮，吸引咗幾百人圍觀。聽日（27日）係華仔56歲生日，大會特別準備咗蛋糕同佢慶祝，至於壽星仔嘅生日願望就係《追龍》大賣。 

華仔同子丹一齊接受訪問，提到黃日華曾經講戲份被剪好多，華仔都話每人大約剪走咗20%，仲話如果反應好，都叫王晶放番啲出嚟或者出DVD。（做上下集？）華仔笑言：「我哋包一集㗎咋！」 

另外，之前華仔fans club聚會片流出，華仔笑言每年都會有臥底出現，不過都係開心事。華仔又話：「今年生日冇乜特別，都係同屋企人食下飯，冇乜特別慶祝，近年去旅行都少。」 

講到聚會上播出嘅短片，見到佢囡囡幫佢抹腳好感動，華仔笑住話：「大家都睇到啦！都唔使我講啦！」至於太太話等佢起身，華仔就有啲尷尬咁話：「大家留意佢哋啲報導啦！」 

演大毒梟跛豪嘅子丹就話，大家對部戲都好有野心，所以拍咗好多，剪咗係有可惜嘅！問子丹係咪剪咗好多動作戲？佢話：「乜都有啲啦！（拍上下集？）我收好平㗎咋！」 

重演跛豪嘅子丹，噚晚都有請第一代跛豪兼好友呂良偉捧場，子丹話佢係呢個角色經典，有參考對方，但自己有自己方法演。 

問佢有冇信心打敗吳京嘅《戰狼》？子丹話：「唔使話打贏邊個，大家都係華語片，觀眾有唔同選擇，唔係剩係睇一部戲咁悶。」

大會預早同華仔慶祝生日。

生日願望係電影有好成績。

講起囡囡同老婆，華仔就冧爆。

黃日華有講過俾人狂cut戲。

 

來源: http://hk.apple.nextmedia.com/enews/realtime/20170926/57256662