(蘋果日報即時新聞)
劉德華最近力谷其新片、根據真人真事改編嘅新作《解救吾先生》，今晚現身九展造勢，導演丁晟亦有出席。華仔喺戲中飾演一名被綁架嘅藝人，大部份戲份是被綁喺床上完成，又要不停講粗口。華仔不諱言對呢部戲寄予厚望。
風塵僕僕嘅華仔，四出宣傳新作，搞到自己聲沙沙，幸好香港是宣傳之旅最後一站喇，導演丁晟聽日就會返北京，但導演都好坦白話有票房壓力。至於五億票房目標，丁晟都係話:「希望越來越好。」輪到華仔話有壓力喇。不過部戲口碑好，仲拎埋《第二屆絲綢之路國際電影節》影帝，華仔謙稱話:「可能各個國家對劉德華認識比較深，因為呢個獎係傳媒投票，可能大家見到我有唔同嘅表現，所以揀我，我都好安慰。」
至於爭逐金像獎影帝，華仔話計緊數，因為部戲唔係港產片，要計番有 幾多港人參與，百分比夠唔夠資格爭逐。「金馬就一定得0架喇，金像獎就未知道。」華仔又話拍本片最辛苦唔係被綁喺床上，而係要講國語。
講到早幾日華仔54歲生日，之前佢仲同帶埋妻女同「華仔天地」歌迷會一班fans慶祝。正日當然留番俾屋企人啦，華仔話當日一家人食餐飯慶祝，問佢3歲嘅Hanna有冇送禮物俾爸爸？華仔笑笑口:「錫咗一啖。」咁有冇畫畫送俾你呢？華仔又笑笑口搖頭:「佢未識。」
太太有何表示呢？華仔又笑笑口搖頭:「我哋冇呢啲嘢嘅，喺一齊，就幸福。」好冧呀!至於生日願望，就係希望部戲票房好:「因為好耐冇遇過咁好嘅電影。」
*************************************************************************************************************************************
【解救吾先生】睇資料睇足一個月
劉德華今晚同導演丁晟，到九展出席電影《解救吾先生》首映，吸引大批粉絲圍觀，由於華仔9.27生日，全場大唱生日歌，大會送蘋果畀華仔做禮物，導演喺台上話籌備呢部戲用咗兩年，資料都有五萬字，呢單係當年好轟動案件，劇組仲訪問埋主人翁吳若甫。
華仔則話：「自己第一次接拍內地警匪片，睇晒資料。」跟住突然痰上頸：「唔好意思，今日唔舒服，睇咗資料一個月，導演本來想搵被綁架嘅吳若甫演，某啲原因最後搵咗我，自己最大問題係講普通話要精準，因為全部都係內地演員，自己花好多時間練台詞，部戲30號內地上映，正正自己農曆生日，希望同蘋果一樣紅下去。」
吴建萍Jennifer