[ムービー] 天王天后變功夫神鵰俠侶

2012-10-01

蘋果日報

【觀塘定富街】中秋花好月圓，不過人夫劉德華同名花有主嘅鄭秀文（Sammi），因為要趕拍杜琪峯執導嘅電影《盲探》，所以噚日凌晨兩點幾，佢哋仲要喺觀塘定富街開工，惟有邊開工邊賞月。

華仔同Sammi喺大銀幕相隔咗8年先再合作，佢哋依然好有默契，噚日凌晨佢哋齊齊以瞓覺look出鏡，華仔着住菠蘿圖案嘅睡衣，同平日見慣嘅官仔骨骨樣完全唔同，睇落好親切好可愛。着蘋果碎花圖案睡衣，兼頭頂有幾個髮卷嘅Sammi好得意，佢着咗厚衫打底，身形脹卜卜，似足電影《功夫》嘅包租婆元秋，直頭可以同華仔組成《功夫》入面嘅「神鵰俠侶」。

時肥時瘦

拍攝另一幕戲時，Sammi忽然瘦番，塊面仲污糟邋遢，佢獨自拖住個篋喺寂靜嘅街度行，真係人見人憐。等咗成粒鐘，都唔見華仔同Sammi有對手戲，佢哋唔使埋位嗰陣，就各自匿喺自己嘅保母車休息。