[音乐]徐小鳳明年紅館開騷 劉華送贈墨寶

(蘋果日報)

徐小鳳將於明年2月喺紅館舉行6場演唱會，今日佢喺金鐘出席演唱會記者會，投資者林建岳及楊受成夫婦出席撐場，而鄭裕玲（嘟嘟）任主持，現場仲有一個波點蛋糕，相當別緻。

小鳳姐喺樂壇極具份量，唔少後輩都預先錄製賀辭，預祝小鳳姐個唱成功，現場播出張學友、鄭秀文、容祖兒及劉德華等錄製嘅賀詞，華仔更送贈墨寶，認真有心思。

其間現場播出由嘟嘟及萬梓良主演嘅《流氓大亨》主題曲《婚紗背後》、以及周星馳喺電影中唱過小鳳姐歌曲等片段。當小鳳姐睇完《婚紗背後》片段，即時興奮地要求嘟嘟及萬梓良，將呢一幕呈現喺佢舞台上，不過嘟嘟就話：「度吓期先。」

片段中祖兒要求小鳳姐一定要着波波裙，小鳳姐就話：「上次喺上海演唱會冇着波波裙，啲歌迷差啲想踩爛個場，今次一定會着。」

鄭秀文建議小鳳姐將一直保持嘅22吋腰，改為29吋腰，咁樣會輕鬆得多，小鳳姐聞言笑說：「我唔介意觀眾上台幫我度腰圍。」

來源: http://hk.apple.nextmedia.com/enews/realtime/20131117/51910919