[電影] 隔牆有耳：《寒戰》謬誤多　睇到你心寒

2012-11-21

(蘋果日報)

上映10幾日嘅電影《寒戰》票房勁收2,600多萬，話佢係歷來細節最「真實」嘅警匪片。熟悉警隊運作嘅前保安局長葉劉淑儀同警務督察協會主席曾昭科總督察就為《寒戰》查找不足，話套戲有好多基本事實都搞錯。嗱！以下內容係有劇透㗎。

套戲入面話警務處副處長（管理）郭富城根據警例，想同高層投票罷免另一位做緊署理一哥嘅副處長（行動）梁家輝。葉太話，警務處長嘅任命要由特首推薦、國務院任命，點會由警隊集體決定咁民主！

至於郭富城同梁家輝開拖一幕，CID同軍裝各撐一邊，有人仲想掹槍。曾昭科同葉劉都話呢幕真係「開玩笑」。因為梁家輝理應掌控CID、軍裝同PTU；郭富城則掌管人事、訓練、質素管理部門，唔係一個管軍裝、一個管CID㗎。
葉劉：疑影射曾蔭培

仲有，PPRB總警司楊采妮，竟然幫保安局長劉德華主持記者會。葉劉話，陪住局長嘅應該係保安局新聞秘書，唔係PPRB。楊采妮仲喺戲中話：「新聞歸新聞，安全歸安全」堅持要9點前出稿畀新聞界保障公眾知情權，八方都好想見到有咁嘅PPRB總警司！

葉劉就大爆，郭富城被揶揄「升得咁快，因為識得整靚盤數」，某程度上可能影射緊前一哥曾蔭培。當年佢做副處長時經濟唔好，警隊高層整靚盤數係當時任務之一。八方就覺得套戲有少少影射曾蔭培、黃燦光當年做副處長時面左左，同鄧竟成父子兵做警察、魔警藏身警隊等恩怨情仇。