[Music]【型爆撐場】華仔做盧冠廷尾場嘉賓唱《如果你是我的傳說》鬼馬喪擺甫士

2016-06-11

(蘋果日報即時新聞)

盧冠廷演唱會尾場今晚喺紅館舉行，捧場嘅有陳慧嫻、杜德偉、卓韻芝、徐小鳳、蔡一傑、蔡一智、蘇絲黃、潘源良、蘇玉華及潘源良等，盧冠廷仲請咗天王劉德華(華仔)做嘉賓，華仔呢排都做過唔少個唱嘉賓，早前人妻Kay(謝安琪)演唱會，華仔亦有現身!

貴為天王嘅華仔以牛仔褲look示人，相當有型，盧冠廷見到華仔上台，大爆華仔第一次獻咗畀佢，原來係講作歌，華仔即解釋：「我第一次寫歌，嗰時好多歌手寫歌畀人唱，我就攞咗佢首歌，寫咗《如果你是我的傳奇》，你哋知唔知幾多年呀？放心，我哋都唔知。」盧冠廷就話自己一直好恨同華仔唱呢首歌：「但佢真係唱得好過我，所以我會畀哂佢唱。」

跟手華仔唱出《緣盡》同埋國語版嘅《如果你是我的傳說》，華仔唱嗰陣仲好鬼馬擺出多個甫士，觀眾反應亦都好好，唱完之後，盧冠廷大讚：「經典嘅歌曲，經典嘅聲音。多謝你!」華仔笑言：「最後一句，香港係每日都有好多煩憂嘅地方，所以我哋一定要有個清泉，繼續每年都開，盧盧。只要你每年都開，我每年都嚟。」

盧冠廷即問觀眾：「係咪呀？」現場傳出歡呼聲，華仔當然牙齒當金使，再次好肯定咁講：「係！」最後，華仔同盧冠廷握手後就走人。